Suroy-Suroy sa kasadpang bahin sa probinsya sa Sugbo malamposon

CEBU, Philippines — Nahimong malampusong ang tulo ka adlaw nga Suroy-Suroy Sugbo didto sa kasadpang lungsod ug siyudad sa Probinsya sa Sugbo.

Sa ika-tulo nga adlaw, gisuroy sa mga partisipante sa maong tourism caravan ang lungsod sa Balamban ug ang siyudad sa Toledo kon diin gisugdan kini pinaagi sa pagtambong sa misa sa Paroquia de San Francisco de Asis sa Balamban nga gipreside ni Msgr. Rey Penagunda.

Mitambong usab sa misa si kalihim Benhur Abalos sa Department of Interior and Local Government (DILG) kuyog nila ni gobernadora Gwendolyn Garcia.

Dayon miadto ang mga partisipante sa duha ka mga dagkong shipyard companies ang Tsuneishi Heavy Industries ug Austal Philippines Pty. Limited.

Apil usab nga gisuroy sa mga partisipante ang Capilla Santa Ana Museum nga usa ka chapel nga susama sa mga kapilya sa Europa.

Gipanag-iya kini ni Lilian Yareda ug sa iyang Canadian nga bana nga si Michael Overs nga nahimutang sa Barangay Ibo sa dakbayan sa Toledo.

Nahimo usab nga kabahin sa caravan ang solar farm sa siyudad sa Toledo ug dayon sa Toledo City Sports Center diin didto nanihapon ang mga partisipante diin sila gilingaw sa mga pasundayag nga giandam sa dakbayan pagpakita sa kultura ug kalamboan sa Toledo.

Mao kini ang mitapos sa tulo ka adlaw nga tourism caravan.

Pito ka mga lungsod ug siyudad ang gisuroy sa mga partisipante sa Suroy-Suroy, apil na ang lungsod sa Tabuelan, Tuburan ug Asturias sa unang adlaw sa caravan.

Niadtong Sabado, gisuroy ang Aloguinsan ug ang Pinamungajan diin ang Hermits Cove ug ang Bojo River cruise maoy pipila sa nahimong bida sa pagsuroy.

Ang Suroy-Suroy Sugbo usa ka tourism caravan sa Probinsya nga nagpromote dili lang sa mga tourism destinations apil na sab sa kultura ug pagkaon ug kasaysayan sa kalungsoran sa lalawigan. (BANAT NEWS)