Upat ka LGU miduso og ordinansahon nga manalipod sa kalikopan

CEBU, Philippines — Lima ka mga ordinansahon nga nagtinguha pagpanalipod sa kalikopan ang giduso sa upat ka mga lokal nga kagamhanan sa Probinsya sa Sugbo.

Ang maong mga ordinansa maoy tun-an karon sa hunta probinsyal.

Si bokal John Ismael Borgonia sa terserso distrito kinsa maoy chairman sa committee on environmental conservation and natural resources nagkanayon nga maayo nga lakang ang gihimo sa lungsod sa Sogod, Consolacion, Carmen ug dakbayan sa Danao nga miduso kini og mga lokal nga balaod aron mapanalipdan ang kalikopan.

Sa lungsod sa Consolacion, ang “Plastic Regulation Ordinance” maoy giduso, samtang sa lungsod sa Sogod gidili niini ang paggamit sa single-use plastics.

Sa lungsod sa Carmen, ang Ordinance No. 073 Series of 2024 gipanghingosgan ang waste segration o pagbulag sa malata ug dili malata nga basura diin adunay silot sa mga molapas niini.

Sa siyudad sa Danao, duha ka ordinansahon ang giduso sa dakbayan ug kini ang balaod pagpanilipod sa wildlife ug exotic resources sa mga hayop ug ang ang Ordinance No. 2024-17-110 o ang pagdeklarar og “Pollution-Free Areas”, diin gidid-an ang tanang pribado ug pampublikong skwelahan sa dakbayan nga mohimo og kalihokan nga makamugna og polusyon.

“We hope nga sa kani nga ordinances, mag-start sa kabatan-onan hangtud na sa katiguwangan nga ma-instill ni nga discipline nga kuwang kaayo nato,” matud ni Borgonia, sa taho sa Capitol Information Office.

Ang silot sa mga molapas sa maong mga balaudnon moabot sa P5, 000 ug posible nga mapriso og hangtud unom ka bulan. (BANAT NEWS)