NICA: Way hulga sa Palaro

CEBU, Philippines — Walay na-monitor nga dagkong mga hulga sa seguridad sa Palarong Pambansa dinhi sa Dakbayan sa Sugbo sumala pa sa National Intelligence Coordinating Agency (NICA).

Kini maoy ilang pamahayag atol sa “1st Critique Session for The Palarong Pambansa” nga gipahigayon kagahapon sa hapon, Hulyo 10, 2024, sa Social Hall sa Cebu City Hall.

Gitambongan kini sa mga kadagkoan sa kapulisan gikan sa Regional, Provincial, Cebu City, Mandaue, ug Lapulapu City police office ang kalihokan, nga naglakip sa mga nanambong ang mga tinugyanan sa Department of Education (DepEd), Highway Patrol Group, Philippine Coast Guard, Department of Social Welfare and Services, ug sa Cebu City Disaster Risk Reduction and Management Office.

Si Deputy Regional Director for Operations sa Police Regional Office-7 P/Col.  Noel R. Flores maoy midumala sa maong kalihokan. Natuki sa panagtigom ang kalangay sa paghatod sa mga pagkaon alang sa kapulisan nga nag-duty sa 30 ka mga dapit duwaanan, ilabi na sa kagahapong adlawa. Mihatag si Flores og grado nga 95.75 sa gipakitang trabaho sa kapulisan, sukad gisugdan ang pagpangandam sa Palarong Pambansa hangtud karong adlawa.  — Jessa Grezil S. Bacus (BANAT NEWS)