10 porsiyento ug dili land swap base sa ordinansa

CEBU, Philippines — Subling gipahibalo ni Gobernador Gwendolyn Garcia nga ipatuman gyud sa Probinsya sa Sugbo ang ordinansa niini nga magkuha og 10% nga share o gahin sa “usable” o magamit nga reclaimed nga luna sa tanang reclamatioin project nga gibuhat sa Probinsya sa Sugbo.

Kini human nga ang pipila sa mga pribado nga kompaniya nga mihimo sa maong reclamation projects mihangyo nga tugotan sila nga mobayad na lang sa Kapitolyo o motanyag og land swap o pagbinayloay og luna nga mokantidad sa 10% nga porsyento sa Kapitolyo gikan sa reclaimed nga luna.

Atol sa tigom sa Cebu Provincial Reclamation Authority (CPRA) sa Kapitolyo niadtong Hulyo 10, si Garcia mipasabot sa mga pribadong kompaniya nga ubos sa Provincial Ordinance 2024-05, dili na mamahimo ang pagbayad og kwarta ug pagbaylo sa luna sa “reclaimation components” tungod ang Kapitolyo modawat ra og 10% nga share o gahin sa magamit nga luna sa mismong ireclaim nga propedad sa maong kompaniya.

Sumala sa Sugbo News, ang news portal sa Probinsya sa Sugbo nga nagpasabot kini nga ang Probinsya mamahimo sab nga usa sa mga tag-iya sa maong mga reclaimed nga luna.

Ang gipasabot ni Garcia nga ordinansa mao ang Ordinance No. 96-14 sa tuig 1996 o ang “Cebu Reclamation Ordinance nga maoy nag-himo sa CPRA nga maoy mo aprobar, mohimo, ug mopatuman sa mga reclaimation projects sa lalawigan. 

Ubos sa maong lokal nga balaod ang CPRA mao usab ang mogama sa mga polisiya ug regulasyon sa reklamasyon nga himoon ug gihimo na sa mga ahensya sa gobyerno ug pribadong kompaniya sa lalawigan.

Ang maong ordinansa giamendaran niadtong 2009, 2023 ug 2024 kon diin ang apil sa probisyon niini ang 10% nga gahin sa Probinsya sa aktwal nga magamit nga “reclaimed land” sa tanang reclaimation projects.

Matud ni Garcia, ang maong polisiya makagarantiya ang makabenepisyo ang Probinsya sa tanang kalamboan sa oportunidad pagpalambo sa ekonomiya pinaagi sa maong mga proyekto.

Apil sa mga reclamation projects nga gihimo karon sa Probinsya mao ang Cebu South Harbor, Mabuhay Filcement, Atlas Fertilizer, Global Business Power Corp., Solid Earth Development Corp., Therma Visayas, Inc., Cebu South Port, Dynacast Shipbuilding and Repairs Inc., ug ang  Cebu Industrial Park Developers, Inc. (BANAT NEWS)