Pagsaway ug paghingalan sa G7 sa China, gihangop
CEBU, Philippines — Gihangop sa Pilipinas ang giluwatang hiniusang pamahayag sa gitawag og Group of Seven’s (G7) nga hugtanong misaway sa gihimo sa Beijing nga militarisasyon ug pagpanghasi ug hulga niini diha sa South China Sea.
“We appreciate the G7’s support in rejecting China’s baseless and expansive claims, and their call for China to cease its illegal activities, particularly its use of coast guard and maritime militia in the South China Sea that engage in dangerous maneuvers and the use of water cannons against Philippine vessels,” matud pa sa pulong sa Department of Foreign Affairs (DFA) sa report sa Philstar.com.
Mao pa kini ang labing una ug talagsaon nga pamahayag sa G7 nga ginganlan gyud niini ang Beijing, ang kapitolyo sa China, ug gisaway ang ilang mga gipangbuhat sa SCS. Ang G7 gilangkuban sa mga nasud sa Canada, France, Germany, Italy, Japan, the United Kingdom, ug Amerika.
“We duly note and appreciate the G7’s reaffirmation that the 2016 Arbitral Award is a significant milestone and a useful basis for the peaceful management and resolution of differences at sea,” dugang pa sa DFA. Atol sa meeting communiqué, ang mga foreign ministers sa G7 mipadayag sa ilang kabalaka bahin sa sitwasyon sa SCS ug gihimug-atan nila sa pamahayag nga walay legal basis ang China aning ilang lapad nga pagpangangkon sa maong kadagatan nga gikonsiderar nga importanteng agianan sa komersiyo.
Ang China padayung nagmagahi sa pag-angkon nga ilaha ang tibuok SCS. Kini bisan pa og nireklamo na ang mga silingan niini ug duna nay ruling nga nag-ingong wala silay katungod sa maong lugar aron kini angkunon.
Sa nanglabay nga mga buwan, nitaas ang tensiyon sa Pilipinas ug China nunot sa nahitabong engkwentro sa mga barko sa duha diha sa West Philippine Sea nga nahimutang sa sud SCS.
Apil niini ang mga insidente sa pagpangbomba og tubig sa Chinese Coastguard sa mga barko sa Pilipinas nga miangol og mga Pilipino samtang naghatud sila og suplay para sa mga sundalo sa BRP Sierra Madre sa Ayungin Shoal o Second Thomas Shoal.
“The Philippines shares the G7’s vision of a stable and secure Indo-Pacific region, and stands firm against any actions that undermine international security and stability,” dugang pa sa DFA. (BANAT NEWS)
- Latest
