‘Spotters’ sa Degamo murder nadakpan

CEBU, Philippines — Makig-alayon ang Police Regional Office (PRO)-7 sa National Bureau of Investigation (NBI) mahitungod sa pagkasikop sa duha ka mga giingong spotters sa Degamo murder case.

Ang duha nadakpan sa NBI Antique mga managsuon nga nag-edad og 20 ug 27 anyos sa usa ka convenience store sa Sagay City, Probinsiya sa Negros Occidental niadtong Abril 12, 2024 pinasikad sa warrant of arrest.

Matud pa sila ang nagsilbing spotters ug naniid sa palibot sa wala pa nahitabo ang pagpatay kang kanhi Governor Roel Degamo ug laing siyam ka tawo sa panimalay niini sa Lungsod sa Pomplona, Negros Occidental niadtong Marso 4,2023. 

Hinuon, giklaro sa PRO-7 nga wala pa sila makadawat og opisyal nga kasayuran mahitungod niini apan buot nilang masayran ang kalambuan sa mga personalidad nga nalambigit sa kaso. Kini gumikan kay ang PRO-7 man nag-una sa imbestigasyon sa Degamo murder case.

Gihulagway sa NBI Antique nga dako og matabang ang pagkasikop sa duha ka mga suspetsado kinsa gitumbok nga spotter sa maong panghitabo 

Apan sa interview sa One Western Visayas sa duha ka mga suspetsado ilang gibarugan nga wala sila’y kalambigitan sa nahitabong krimen.  Kasamtangan sila karong gitanggong sa detention facility sa NBI Antique.

Kahinumdoman nga gikasohan na og murder ang gitumbok nga mastermind sa maong masaker nga si kanhi kongresista Arnolfo “Arnie” Teves Jr., gawas kaniya, duna pay laing sobra napulo ka mga tawo nga giingong nalambigit sa krimen ang nangadakpan na ug napasakaan na og susamang kaso.

Gawas pa sa Degamo murder, si Teves gikasohan sab og laing murder case may labot nahitabong pagpatay niadtong tuig 2019 diha sa Bayawan City, Negros Oriental.

Si Teves kusganong mihimakak sa mga pasangil ug kini milarga ngadto sa nasud sa Timor Leste diin matud pa nangayo kini didto og political asylum, apan sa sayo niining tuiga, gidakop kini sa mga sakop sa International Police kauban ang kapolisan sa Timor Leste. Si Teves, gitaktak na sab sa pagka-kongresista sa Ubos Balay Balauranan ug gikonsiderar na nga usa ka terorista sa gobiyerno sa Pilipinas. IBM  BANAT NEWS