Namusil sa mga batan-on sa Sambag 1 nailhan
CEBU, Philippines — Nailhan na sa Abellana Police Station 2 sa Cebu City Police Office (CCPO) ang mga suspek sa pagpusil patay sa usa ka 17-anyos nga menor de edad diha sa Urgello Street, Barangay Sambag 1, Siyudad sa Sugbo niadtong Miyerkules sa kaadlawon, Mayo 1.
Ang maong insidente miangol sab og laing menor de edad nga kauban sa namatay kinsa anaa pa karon sa tambalanan padayon nga nagpaalim sa naangkon nga samad-pinusilan.
Nagkanayon si Police Lieutenant Colonel Janette Rafter, Deputy City Director for Administration sa Cebu City Police Office gisubay nila nga dunay personal nga kasuko ang mga suspetsado sa mga biktima.
Kahinumduman, samtang sakay sa e-bike gikan nag-internet ang mga biktima uban ang mga amigo ilang nasugatan ang tulo ka mga lalaking sakay og pula nga motorsiklo.
Padulong na unta sila mouli sa dihang ilang nasugatan ang tulo, matud pa mi-u turn og kalit ang motor ug gibalikan sila ug gipangutana sila kun nganong tabis sila og tinan-awan ug walay daghang estorya gipaulnana sila og bala.
Nakuha diha sa crime scene ang basiyo sa kalibre. 45 nga armas. (BANAT NEWS)
- Latest