Duha balik prisuhan, drug dens gironda

CEBU, Philippines — Balik sa prisuhan ang duha ka mga tawo nga dili pa lang dugay nakalaya human madakpan sa buy-bust operation sa City Intelligence Unit sa Cebu City Police Office (CCPO) sa San Jose Village, Cabarrubias Street, Barangay Tisa, siyudad sa Sugbo kagahapon sa alas 12 sa tungang gabii.

Ang mga suspetsado mao sila si Nhemrod Misa Inesola alyas Nhemrod, 49, nagpuyo sa maong barangay ug Almar Bacalso Abejero alyas Mal, 24, taga Barrio Luz, nga parehong  nabutang sa Priority Regional Level sa kampanya batok ilegal nga drugas.

Ang mga suspetsado nakuhaan og 105 gramos sa gituohang shabu nga nagkantidad og P714,000.

Matud ni Police Lieutenant Colonel Janette Rafter, Deputy City Director for Administration sa Cebu City Police Office ang mga suspetsado nadakpan na kaniadto tungod gihapon sa ilegal nga drugas.

Si Inesola nabilanggo sa Cebu City Jail Male Dormitory sulod sa pito ka tuig samtang si Abejero lima ka tuig na priso sa mao gihapong prisohan ug niadtong Nobiyembero 2023 lang ang duha nakagawas.

Samtang tulo ka matud pa tigmentinar sa drug den ang nasikop sa buy-bust operation sa mga tinugyanan sa Philippine Drug Enforcement Agency Central Visayas uban sa pakig-alayon sa mga tinugyanan sa Sawang Calero Police Station sa Cebu City sa may Barrio Wakwak,Barangay Suba sa samang dakbayan.

Ang nasikop mao mao si Ramelito Lerma,53, ug ang mga parokyano niini nga waiter ug call center agent nga sila si Ryan Doños,38, ug Angelits Doños, 35.

Nasakmit gikan sa dinakpan ang 17 ka pakete sa gituohang shabu nga motimbang og 36 grams nga mobalor ug dul-an sa P245 mil, buy-bust money, kwarta nga dul-an sa P200 ug mga gamit pagsuyop.

Ang dinakpan  nga si Lerma, graduate sa community-based drug rehab sa Suba niadtong 2021. Apan mibalik kini sa ilegal nga bisyo ug negosyo, base sa report, makadispatsar kini og dili mominos sa 30 ngadto sa 50gramos matag semana.

Drug dens

Sukad sa buwan sa Enero hantod sa Mayo 1 karong tuiga ang Philippine Drug Enforcement Agency nakabungkag og 19 ka drug dens sa tibuok Rehiyon Siete.  Matod ni Leia Alcantara tigpamaba sa PDEA-7 sa 19 ka drug dens nga naguba 12 niini gikan sa Cebu City.

Hinoon, gilauman na nila nga ang Cebu City maoy pinakadaghan og drug dens nga maguba gumikan kay dako ang populasyon ug daghang mga tawo nga mag-adtoan sa siyudad.

Gikonsiderar sa PDEA-7 nga usa ka high impact operation ang pagguba sa mga drug dens kay magsilbi kining breeding ground sa mga kriminal.

SACLEO

Samtang sa Lapu-Lapu City Police Office (LCPO) moabot 1,065,85 gramong shabu nga nagkantidad og Php 7, 247, 780 ang nasakmit gikan sa 12 ka mga gipasanginlang drug pushers apil ang usa ka High Value Individual sa ilang duha ka adlaw nga Simultaneous Anti -Criminality Enforcement Operation  (SACLEO) nga ilang gihimo niadtong Abril 29 hangtod sa Abril 29, 2024.

Si Police Colonel Ali Baron, Officer -In-Charge director sa LCPO miingon nga apil sa ilang nadakpan ang 14 ka mga nalambigit sa illegal sugal nga Suwertres.

Nadakpan sab ang 13 ka mga wanted nga dunay mga warrants of arrest sa korte, apil niini usa ka Most Wanted Person nga Top 7 sa provincial level. — Rowena Capistrano, Romeo T. Limpangog (BANAT NEWS)