Ceremonial lighting sa dayan-dayan sa Pasko sa Mandaue karong Dec. 15

CEBU, Philippines - Gipaabot nga mamahimong mabulokon ug nindot tan-awon ang ceremonial lighting sa tanang dayan-dayan alang sa Pasko karong tuiga sa dakbayan sa Mandaue nga himuon sa gabii sa Disyembre 15.

Si Mayor Jonas Cortes maoy mangulo sa ceremonial lighting nga matigayon human sa parada sa mga lanterns ug parol nga hinimo sa matag barangay isip pagbukas usab sa indigay nga gipasiugdahan sa kagamhanan alang karong tuiga.

Ang tourism officer sa dakbayan nga si Luela Cabanero nga nahinabi sa mga tigbalita miingon nga pilian ang labing nindot nga lanterns ug parol ug adunay dakong ganti nga madawat alang niini.

Gitataw niya nga human sa parada mosunod ang ceremonial lighting kon pagpasiga sa mga dayan-dayan sa Pasko nga kasamtangan na karong gipahiluna sa kadalanan sa maong dakbayan.

Lakip sa motambong ang mga konsehal sa dakbayan nga pangulohan ni Bise Mayor Glenn Bercede ug mga kapitan nga pangulohan usab sa ilang presidente sa liga nga si Subangdaku barangay Kapitan Ernie Manatad ug uban pa.

Dugang pa ni Cabanero nga nagkadaiyang kalingawan nga gipahaum sa pagkatawo sa Ginoong Hesukristo ang ipasundayag nga apilan usab sa mga tinun-an sa publikong tulunghaan. – BANAT NEWS