37 ka contingent na ang mosalmot sa Sinulog Ritual Showdown 2025

CEBU, Philippines — Gibutyag ni Sinulog Foundation Inc. Executive Director Elmer “Jojo” Labella nga niabot na sa 37 ka contingent ang mosalmot sa Sinulog Grand Ritual Showdown 2025 karong Enero 19, 2025 diha sa Cebu City Sports Center.

Gillangkuban kini sa 10 ka out of town contingents nga mao ang City of Kidapawan Performing Arts Guild gikan sa Probinsiya sa Cotabato, Bais City Festival of Harvests sa Negros Oriental, James L. Chiongbian National Trade School Performing Arts Guild sa Saranggani Province, Tribu Kamanting Performing Arts Guild Barug Dinagat Foundation sa Dinagat Islands, Baile Filipina Dance Guild Inc. sa Dipolog City, Kabilin Mindanao Province sa Davao Occidental, Zamboanga Hermosa Festival, Tabaco College sa Albay, Bakhaw Performing Arts Guild Nan Del Carmen sa Del Carmen, Siargao ug ang contingent gikan sa Antipolo, Rizal nga Antipolo Maytime Festival Bukluran Dance Troupe nga mosalmot sa unang higayon.

Samtang ang 17 ka contingents ang gikan sa mga barangay ug mga tunghaan sa Dakbayan sa Sugbo nga gilangkuban sa Landonian Tribe sa Barangay Kamagayan, Asian College of Technology International Education Foundation, Banauan Cultural Group, Aktivong Binaliwhanon,  Banay San Nicolasnon, Abellana National School, Kalunasan Cultural Dance Troupe, Barrio Basak Pardo, Barangay Zapatera, Inayawan Talents LGU, Maampoong Baniladnon, Hugpong Day-asanon, Tribu Mabolokon sa Barangay Mabolo, Hugpong Mananayaw ng Bayan sa University of the Philippines, Lumad Basakanon, Hugpong Masidlakon sa Siomai Festival sa Barangay Tisa ug Banay Labangon.

Ug ang walo ka contingents naggikan sa Probinsiya sa Sugbo gilangkuban kini sa Dakbayan sa Talisay, Malipayong Alegrianhon sa Munisipalidad sa Alegria, Dakbayan sa Mandaue, Tribu Masadyaan sa Dakbayan sa Toledo, Dakbayan sa Lapu-Lapu, Tribu Malipayon sa Munisipalidad sa Consolacion, Pundok Sa Nagkahiusang Liloanon sa Munisipalidad sa Liloan ug Dakbayan sa Danao.

Nasayran nga lakip sa mopasundayag ang contingent gikan sa Kagamhanan sa Dakbayan sa Sugbo ug ang Masskara Festival gikan sa Bacolod City.

Si Labella nagkanayon nga posibleng madugangan pa ang gidaghanan sa mga contingent nga mosalmot sa dakong kalihokan apan gipahimangnoan siya ni Mayor Raymond Alvin Garcia nga limitahan lang kini ngadto sa 40 ka contingents.

Gawas sa mga contingent mopasundayag usab ang floats, higantes, puppeteers ug uban pa. (BANAT NEWS)