Cebu City magbutang og firecracker zone matag barangay

CEBU, Philippines — Pipila ka adlaw na lang sa dili pa ang bag-ong tuig diin nagplano si Cebu City Mayor Raymond Alvin Garcia nga magbutang og designated firecracker zone sa matag barangay.

Atol sa press conference kagahapon gibutyag ni Garcia nga giumol na karon ang executive order alang sa mga firecracker zone sa siyudad. 

Mamahimo nga magpabuto og mga firecracker sa dakong hawanan, basketball area, park o mas luwas nga lugar layo sa mga kabalayan aron malikay sa peligro ang mga residente sa siyudad.

Ug kong kong mapagawas na ang maong executive order andam na ang kapolisan ug ang mga tanod sa pagsunod niini sama sa pagdakop sa mga dili mosunod sa  maong kamandoan.

Gawas niini, gusto usab ni Garcia nga adunay designated area kun asa mamahimong makabaligya og mga pabuto dili lang bisag sa asa lang sa siyudad.

Sa pagkakaron, ang gitugotan nga mamahimong makapaninda og mga pabuto anaa kini nahimutang sa South Road Properties. (BANAT NEWS)