Haze

Nunot sa pagtibugsok og maayo sa air quality dinhi sa Metro Cebu, ang dakbayan sa Sugbo, Lapu-Lapu ug Minglanilla mideklarar nga isuspenso una ang face-to-face classes karong adlawa.

Si Mayor Nestor Archival gahapon pa sa hapon misugod og deklarar nga isuspenso ang klase tungod kay sigun sa monitoring sa Department of Environment and natural Resources (DENR) nagkagrabe ang abog gikan sa wild fire nga nasinati sa Indonesia.

Matud sa mga eksperto nga tungod sa habagat gihigop niini ang aso gikan sa Indonesia paingon dinhi sa atong dapit hinungdan nga kun nakabantay mo murag dunay gabon ang palibot.

Apan kini aso nga dunay labihan ka pino nga abog nga dilikado sa panglawas labi pa sa mga dunay hubak.

Sigun sa monitoring kagahapon, and air quality index sa Metro Cebu mitala na og kapin sa 200 ang PM2.5 o ang particulate matter o abog nga anaa sa hangin. Mas taas ni kay sa kapin sa 170 nga natala niadtong Martes.

Sigun sa talaan sa DENR, ang kapin sa 200 nga PM2.5 maisip nga “acutely unhealthy” alang sa mga tawo busa giawhag ang tanan nga mag-amping.

Kun mahimo likayan ang pagpundo og dugay sa gawas sa panimay. Sirad-an ang mga pultahan ug bintana aron dili makasulod ang abog ug magsul-ob og face mask.

* * *

Nakasabot ko nga dili maayo ang epekto sa panglawas sa pino nga abog nga naglutaw sa hangin apan kinahanglan ba nga isuspenso na sab ang klase? Sa akong tan-aw mahimo man tingali nga dili isakripisyo ang klase kun magsul-ob lang og face mask ang mga estudyante.

Taud-taud naman gud nga nasakripisyo ang pagtuon sa mga estudyante tungod sa pagpunay og suspenso sa klase.

Sa nangangi nga mga semana taas-taas ang higayon nga way klase ang mga tinun-an tungod sa isyu sa seguridad nunot sa mga hulga sa pagpamusil.

Niining bahina makasabot ko nga isuspenso ang klase tungod kay dili katiawan ang maong isyu.

Apan niining isyu sa haze mahimo man tingali nga atong kaprotehian ang mga tinun-an bisan og magpadayon ang klase kun ato lang silang hatagan og face mask.