Plate Numbers

Gipahibawo sa hepe sa Land Transportation Office nga sugdan na nila pagpanakop ang mga sakyanan nga wa tauri og plaka nga giisyu gikan sa LTO.

Maayo baya ang tumong ni LTO Chief Markus Lacanilao, apan naghinubra na sab nga dili na makiangayon sa ubang mga motorista.

Ang numero uno nga nakahimo og sayop mao ang LTO kay nganong napakyas man sila sa paghatag dayon og plate numbers sa mga nagparehistro og sakyanan?

Kay wa may plaka nga gihatag dayon sa LTO sa mga tag-iya og sakyanan, ang mga tag-iya napugos sa pagpahimo og improvised plates aron temporaryong itaud sa ilang mga sakyanan.

Daghang mga tag-iya og sakyanan nga gihatagan sa LTO og “Authority to use Improvised Plates” nagpahimo lang og improvised plates nga metal aron lig-on ug dili dali maboak.

Ang mga plastic nga plaka gud, dali ra mabuak. Dunay nanghimo og plate numbers nga metal, ug susama gyud sa original plate. Matud ni Lacanilao nga dili kini pwede gamiton kay usa kini ka imitasyon.

Para nako nga nahimo kaniadto nga LTO deputized agent sulod sa tulo ka tuig, wa ra man kini problema ba, basta ang gihimo nga plaka ang mga numero ug letra, sundog lang sa nakabutang sa iyang rehistro.

Apan ang kamandoan ni Lacanilao kay sakmiton ang maong mga plaka kay ang gusto niya platic nga plaka, unya butangan lang og marka sa ubos nga “Improvised Plate.”

Tan-aw nako, usa na kini ka pagkuti-kuti sa mga tag-iya og sakyanan nga wa dayon maisyuhi og plaka sa LTO. Midayeg na man unta ko ni Lacanilao, apan tungod niining iyang kamandoan, nakapangyamiid na ko.

Ikaw na man gyud karon ang nagdumala sa LTO, angay nimong siguroon nga kon dunay tag-iya og sakyanan nga iparehistro sa LTO, kinahanglang naa dayo’y ikahatag nga plaka.

Nahibaw-an na man nga matag tuig, magsaka ang gidaghanon sa mga sakyanan nga iparehistro, nganong dili man ninyo kini kahimoan og mga pamaagi?

Pagpahimo kamo og daghang plate numbers nga ipadala sa lainlaing LTO regional office aron nga dunay ikaisyu dayon sa mga motorista nga magparehistro og bag-ong sakyanan.     

* * *

Akong ipahibawo nga ang motor sa akong anak nadakpan sa mga traffic enforcer samtang gi-park sa sidewalk sa atubangan sa University of Cebu. Sa way pagbagolbol, bayad lang sa multa nga P2,500.

Para sa uban nga wa pa madakpi sa pag-park sa mga sidewalk, ayaw ninyo kini himoa kay aron dili mausik ang inyong kuwarta. Awhagon sab nako ang mga traffic enforcer nga padayona ang inyong gihimo.

Kon gusto kita og kausaban, dili kita masuko kon mohimo sa ilang katungdanan ang mga enforcers.