Kalibog sa libreng sakay

Dili pa dugay nag-viral ang video nga gi-post sa The Freeman mahitungod sa usa ka modern jeepney nga kabahin sa Libreng Sakay Program sa gobyerno.

Ang video kuha sa reporter mismo sa The Freeman nga si Jonnavie Villa diin iyang nasaksihan giunsa pagbalibad sa driver ang mga pasahero nga buot untang mosakay nga libre gawas sa usa ka mall sa Barangay Mabolo, Cebu City.

Basi sa  video, nibalibad ang driver nga mopasakay tungod kay dili kuno “bus stop” ang dapit diin nag-atang ang mga pasahero. Apan sa samang video makita nga dunay pasahero nga iyang gipakanaog hinungdan nga nag-alboroto ang mga pasahero nga nag-atang sa maong dapit. Ilang panguta: Kun dili man diay “bus stop” ang maong dapit nganong siya nihunong ug nagpakanaog og pasahero?

Ang video niabot sa kadagkuan sa Department of Transportation (DOTr) hinungdan nga gimandoan sa Land Transportation Franchising and Regulatory Board (LTFRB) ang operators sa duha ka modern jeepney nakita sa video nga wala magpasakay og mga pasahero nga mopasabot nganong dili isuspenso ang ilang prangkisa ug kanselahon ang kontrata sa libreng sakay.

Ang mga operators gimanduan nga mopatim-aw didto sa buhatan sa LTFRB-7 karong Huwebes, Nobyembre 12, aron tubagon ang show cause order batok nila. Dili sa paglaban sa mga operators, apan sa akong tan-aw luoy pud baya kun sila nga mga namuhonan ang silotan sa sayop sa ilang driver.

Dili man intawon sayop sa operator ang binuhatan sa ilang mga driver. Kun ato sab nga tuohan ang giingon sa driver nga dili “bus stop” ang dapit nga giatangan sa mga pasahero, tingali dunay problema ang pagpatuman niining maong programa.

Aron malikayan ang kalibog sa mga pasahero ug sa mga driver nga kabahin sa kontrata sa Libreng Sakay angayang klarohon sa DOTr pinaagi sa LTFRB ug sa mga lokal nga kagamhanan asa dapit ang mga bus stop.

Angayang ilang butangan og dako nga tarpaulin ang mga gidesignate nga bus stop aron mas sayon alang sa mga pasahero. Mas maayo sab nga ibutang diha sa mga bus stop ang schedule sa oras sa libreng sakay aron mas han-ay ug klaro alang sa mga pasahero labi pa nga lahi man diay ang gitas-on sa oras sa weekdays ug sa weekends ug holidays.

Nganong di man ni himuon sa LTFRB aron way rason ang mga pasahero nga moreklamo ug adto sila mag-atang sa mga dapit nga wala i-designate nga “bus stop”?  Ug daw di man sab ganahan ang LTFRB nga ipahibawo sa publiko ang mga oras sa libreng sakay, labi pa ang gipamub-an nga mga oras sa byahe panahon sa weekends ug holidays?