Oportunidad

Gianunsiyo sa kagamhanan sa Estados Unidos nga walay pinirmahay tali sa Amerika ug Pilipinas nga mahitabo atol sa umaabot nga ASEAN Summit karong bulana alang sa katukoran sa Pax Silica sa nasud.

Matud ni U.S. Ambassador Lee Tipton nga wala sa plano ang pinirmahay sa Pax Silica Economic Security Zone ini'g pahigayon unya sa ASEAN Leaders' Summit.

Ug mahibaw-an ra unya ang desisyon atol sa consultation uban sa kagamhanan sa Pilipinas.

Gikonpirma nga motambong si U.S. President Donald Trump sa maong Summit sa kaulohan.

Ug mitumaw ang mga taho nga adto unya gipahigayon ang pinirmahay sa Pax Silica tali sa Amerika ug Pilipinas.

Init kaayo ang mga mikontra sa Pax Silica nga adto gi-proposed sa New Clark City sa Tarlac, ilabina kadtong mga sakop sa mga cause-oriented groups ug ubang sektor. Kay lagi dako kuno kini og kadaut sa nasud.

Hinuon, makasabot ra usab kita niiniing ilang mga lakang. Kay lagi mga militante, ila usab kanang katungod sa pagprotesta.

Alang kanila, ang Pax Silica walay maayong ikadulot sa ekonomiya sa Pilipinas.

Apan, klaro usab nga kulang sa pagsabot kining mga militante ug ubang misupak sa kaugmaran sa Pax Silica. Klaro nga mas gipili nilang yam-iran ang dakong benepisyo nga makuha sa Pilipinas gikan niini.

Hinuon anaa pa sa initial stage ang lakang pagtukod sa Pax Silica dinhi sa Pilipinas. Ug ang kaugmaran niini depende unya sa paningkamot sa kasamtangang administrasyon.

Alang kanako, nganong dili man nato hatagan og dakong tsansa nga mobunga og maayong benepisyo ang Pax Silica? Kini nga inisyatiba usa ka talagsaong oportunidad  pagpalambo sa atong nagsangkiig nga ekonomiya nga dili angay palabyon.