Maong walay kudeta
Hinaut nga nakasabot na si Bise Presidente Sara Duterte nganong wala molusad og kudeta ang kasundalohan batok ni Presidente Ferdinand Marcos Jr. Bisan sa kapin duha na ka tuig nga kampanya nga mobakwi ang Armed Forces of the Philippines (AFP) sa ilang suporta sa commander in chief.
Kay ang Philippine Army, kinadak-ang sanga sa AFP, nahibawo na niadto pang 2024, sa samang tuig nga gilusad ni kanhi Presidente Rodrigo Duterte ang Maisug rallies, nga giduhig ni VP Sara ang organisasyon aron pagtabon sa pataka nga gasto sa iyang confidential funds.
* * *
Wala maikog si VP Sara sa kasundalohan nga tinuod nga nagbuhis sa ilang kinabuhi para sa nasud. Iyang gipasanginlang nakadawat og P15.54 milyones sa confidential funds sa Department of Education (DepEd) dihang siya pay education secretary sa 2023. Bisan walay nadawat ang AFP nga bisan usa ka dako gikan niya.
Dili pa igo nga gisugo ang mga sinaligan nga taga Davao pagmaniobra sa mga dokumento sa P612.5 milyones nga confidential funds sa Office of the Vice President (OVP) ug DepEd. Gihilam-osan pa gyod og lapok ang AFP.
* * *
Mao diay. Nga bisan sa pamuyboy sa iyang amahan nga iyang administrasyon ang responsable sa pagdoble sa suweldo sa mga polis ug sundawo walay opisyal sa aktibong serbisyo nga nidason sa iyang pagtawag ni Marcos Jr. nga bangag.
Mao diay. Nga bisan sa pagkabisto sa labing dakong kinawatay sa kasaysayan–ang P1.7 trilyones nga flood control scandal–ang kapolisan ug kasundalohan wala mokuyog sa mga protesta sa mga Duterte. Ug bisan sa mas dagkong tapok sa Iglesia ni Cristo.
* * *
Kay nakalili na diay. Sa abilidad sa anak nga susama kon dili man molabaw pa sa amahan. Dili managana sa paggamit sa mga institusyon aron pagpatuman sa bisan unsa niyang mga pangabuso. Ug kon masakpan aron pagtabon sa iyang mga binuang.
Kay sama sa kinabag-an sa katawhan nabalaka sab diay. Nga kon makabalik ang mga Duterte sa Malakanyang, sila na say gamiton sa paghudlat sa lehitimong mga protesta batok sa kasaypanan sa administrasyon. Ug sa makausa pa sila na say magkabulingit sa mas grabe nga mga eskandalo ug magkadugo sa mas bangis nga laktod nga pinatyanay.
* * *
- Latest
