EDITORYAL — Lihok mga barangay

Karong nagsige na og init ang panahon tungod sa El Niño, maayo tingaling molihok pud ang mga barangay pagpanglimpyo sa mga kanal sa ilang mga dapit. Makahigayon na gyud karong panahona nga kubkubon ang baradong mga kanal ug mga agianan sa tubig mentras wala pay kusog nga ulan.

Pero nabantayan nga pipila ra man ka barangay ang nagpakita og inisyatiba para limpyohan ang ilang mga kanal.

Unsa diay ni, nagpaabot pa sila sa ilang mga mayor o taga DPWH para maoy molihok?

Parehas ra ning sitwasyona sa uban pang sitwasyon matag dunay mahitabo sa mga komunidad.

Mas ganahan lang sila moreklamo imbes nga motabang sa nasudnong gobiyerno para matabangan ug mahatagan og alibyo ilang mga konstituwente.

Naa gyuy ubang mga barangay nga pwerteng hunita mopagawas og kwarta para pagtabang maarang-arang ang kahimtang sa ilang mga konstituwente nga naapektahan sa baha.

Ngil-ad kaayong palandungon nga ang mga barangay officials pirme lang basulon ang ilang lungsod o ang nasudnong kagamhanan sa mga butang nga kaya ra nilang solusyonan.

Naanad man gud ang uban nga dili managana, dili agresibo sa pag-aksyon, ayha lang molihok kun nagkaproblema na, ang resulta, kasagaran sa ilang aksyon kuwang ug dili paigo, pero dali kaayo silang mamahid sa basol ngadto sa nasudnong kagamhanan.

Karon nga wala kaayong sulod nga tubig ang mga kanal ug mga sapa, panahon na tingaling kinahanglang hawanan ni sa tanang nabaradong basura, mga gapnod, ug uban pa.

Para kung moulan man, paspas rang molurang ang baha. Dili puydeng isalig lang tanan sa mga barangay ang pagpangita og solusyon sa nasudnong kagamhanan.

Kanang kanunay ug regular nga pagpanglimpyo sa  mga kanal, sapa-sapa  uban pang agianan sa tubig dako na kana og matampo para sa kaayohan sa ilang mga konstituwente.

Mismo ang mga barangay opisyales tapulan molihok ug dili gani makamaong moatiman sa ilang hurisdiksyon sama anang paglimpyo sa mga kanal ug agianan og tubig, pagpangusog pagpanakop anang mga pasekretong molabay og basura diha sa dalan bisan wala pay oras sa tingkolekta.