Tabos batok Bilyones

Giuyonan sa Sandiganbayan Fifth Division ang motion sa Ombudsman nga itagak si kanhi DPWH Secretary Manuel Bonoan sa plunder of graft charges nga gipasaka kaniya kauban ni Senador Jinggoy Estrada bugti sa paghimo sa kanhi kalihim isip state witness.  Sa balaod, ang tawo nga himoong state witness mao kadtong least guilty sa tanang gipangkiha. Mora’g haum ning kahimtanga ang panultihon nga, “Kon tabos-tabos lang ang imong kawaton, seguradong mapriso ka.  Apan kon minilyon o binilyon ang imong kawaton, mahimo mo’ng bayran ang imong kagawasan.” Muleeng!

“Farm-to-pocket”

Kon si Agriculture Secretary Francisco Tiu Laurel ang pasultihon, dili paigo ang P16 billion nga giproponer sa 2027 budget alang sa construction ug rehabilitation sa mga farm-to-market road (FMR) projects.  Base sa transparency portal sa FMR Infrastructure projects gikan sa tuig 2021 ngadto sa tuig 2026, aduna na’y nagahin nga P109.53 billion alang sa FMR apan katunga pa lamang sa target ang nakompleto. Matud pa sa mga observers, “Binilyon na ang nagahin nga pundo sa FMR, apan wala gihapo’y kahumanan tungod kay, inay farm-to-market, nahimo man’g farm-to-pocket ang mga proyekto.” Madahaan!

Pinaagi lang sa vibes

Buot ang Cebu City Traffic Management Coordination Board (TMC) nga makakuha og komprehensibong listahan sa tanan’g mga carwash businesses human masayran nga nakatampo kini sa traffic congestion sa dakbayan.  Aduna ba kahay siyentipikong basehan kining pasangil sa TMC?  Kon nakatampo man sa traffic congestion ang mga carwash businesses, pila sad kaha ka porsyento sa trapik ang ilang natampo? Alang sa uban, kakulang sa saktong traffic management ang hinungdan sa traffic congestion. Matud pa sa usa ka observer, “Ang traffic management sa dakbayan daw gipadagan lang pinaagi sa vibes sa mga traffic enforcers.” Fezteleern!

Walay conflict of interest

Matud pa ni Cebu City Mayor Nestor Archival ang pagpanag-iya niya’g propreyidad sulod sa Monterrazas de Cebu dili matawag nga conflict of interest ug wala kini maka-inpluwensa sa iyang hukom sa dili pagluwat og cease and desist order batok sa maong estate development.  Sayop usab kuno ang pasangil nga wala niya itug-an nga aduna siya’y propreyidad sa maong lugar kay iya na man gani kining gibutang sa iyang 2025 SALN sa dihang na-impas na kini niya pagbayad. Mahimo tingaleng depensa sa mayor ang argumento nga, “Kon sa pag-atiman niya sa kaayohan sa uban, maatiman usab niya ang iyang kaugalingong kaayohan, dan, walay conflict of interest nga angayan hisgotan.” Mao sad!

“No pigs allowed”

Napakgang sa kapolisan ang pagsuway unta pag-smuggle sa 125 ka buok baboy gikan sa Negros paingon sa Cebu didto sa Barangay Lambug, Badian, Cebu.  Gikompiskar ang mga baboy pinasikad sa kamanduan sa dakbayan sa lalawigan sa Sugbo sa pagdili sa entry sa mga baboy gikan sa Negros aron malikayan ang sakit nga African Swine Fever (ASF). Matud pa sa mga manakopay, “Malas lang sa mga negosyante kay tungod sa ASF, NPA na ang mga baboy gikan sa Negros nga buot ipasabot, “No Pigs Allowed”. Pagkatoytoy!