‘Salamin’ (Part 14)
“DAHIL sa nangyaring iyo, lalo pang napamahal kina Lola Elisa at Lolo Fernan ang antique na salamin. Iningatan nila nang labis. Laging pinupunasan ni Lola. Laging sinisiguro na hindi ito babagsak sa pinagsasabitan.
Nang nag-aagaw buhay na raw si Lola ay ang salamin pa rin ang laging binabanggit nito. Ang huling namutawi sa labi ay “ingatan ang salamin”. Nalagutan ng hininga si Lola.
Humagulgol ng iyak si Lolo Fernan. Niyakap niya ang katawan ni Lola. Nangako na hindi pababayaan ang salamin.
Tuwing umaga, naging routine na ni Lolo ang pagpupunas sa antigong salamin. Bago siya magsimula sa ibang gawain, ang paglilinis muna ng salamin ang inuunan niya. Sinisiguro na malinis na malinis ang salamin.
“Nagpakita rin ba si Lola Elisa kay Lolo Fernan sa pamamagitan ng salamin.”
“Sabi ni Mama, hindi raw.”
“Bakit kaya?”
“Yan nga ang isang misteryo na hindi namin nalaman.”
“Nabuhay ba nang matagal si Lolo Fernan?”
“Hindi. Eksaktong isang taon mula nang mamatay si Lola, namatay naman si Lolo. At ang nakapagtataka, ganundin ang petsa at oras ng kamatayan niya.”
Nanghilakbot ako. (Itutuloy)
- Latest
