Anak ng bestfriend tinangay sa utang

CAVITE, Philippines  — Ligtas na nabawi ng mga awtoridad ang isang walong buwang sanggol matapos na tangayin at ipatubos ng matalik na kaibigan ng kanyang ina dahil sa pagkakautang sa Bacoor, Cavite kamakalawa. Kinilala ang nailigtas na si Lester Santiarez, 8-buwang gulang at residente ng Espiritu Compound, Barangay Panapaan 4 ng bayang nabanggit habang nasakote ng kapulisan ang suspek na si Emily Dilaop alias Ems, 27-anyos, may-asawa at resi­dente ng Barcelona 1, Barangay Buhay na Tubig, Imus, Cavite. Sa imbestigasyon ni PO1 Jacquiline Salazar dakong alas-11:00 ng umaga ng umiiyak na magreklamo sa himpilan ng pulisya ang ginang na si Connie Santiarez Leonardo matapos na tangayin ni Dilaop ang kanyang anak. Nabatid na humihingi ng ransom na P20,000 ang suspek sa una dahil may utang umano ito sa kanya kaya’t agad na nagsagawa ng entrapment ng mga awtoridad na nagresulta sa pagkakaaresto sa suspek.