Thurman may payo kay Pacquiao
MANILA, Philippines — May payo si Keith Thurman kay People’s Champion Manny Pacquiao sa pagharap nito kay reigning World Boxing Council (WBC) welterweight champion Mario Barrios sa Hulyo 19.
Hindi bago si Thurman kay Barrios dahil naglaban na sila noong Pebrero 5, 2022.
Kaya naman kabisado nito ang galaw ni Barrios at alam nito ang ilan sa mga estratehiya nito.
Matatandaang tinalo ni Thurman si Barrios via unanimous decision.
Kaya naman may payo si Thurman sa Pinoy champion.
“But one thing I took away, even though I beat him, is that he has a really good jab,” ani Thurman sa panayam ng Fight Hype.
Ang solidong jab ni Barrios ang naging armas nito para talunin si Yordenis Ugas noong 2023.
Si Ugas ang tumalo kay Pacquiao sa kaniyang huling professional fight noong 2021 bago ito magretiro sa boksing.
“He used that jab when he beat (Yordenis) Ugas, and Ugas beat Pacquiao because he stayed long. So I think if Barrios works that jab of his, makes the old man use his legs and work really hard to get inside, I think he can pull it off,” kuwento pa ni Thurman.
Gayunpaman, tiwala si Thurman na matatalo ni Pacquiao si Barrios.
Kailangan lamang ni Pacquiao na maikundisyon ang kaniyang katawan.
Kung makukuha ni Pacquiao ang 100 porsiyento, walang duda na magiging mabagsik ito sa pagharap nito kay Barrios.
- Latest
