NBA 2k14 nasa Pinas na

MANILA, Philippines - Dumating na ang pinakahihintay ng mga basketball gamers sa Pilipinas.

Nasa bansa na ang NBA 2k14 at huwag kayong mabibigla kung hindi n’yo na makita ang mga basketball gamers sa mga kalsada.

Makikita sa PS3, Xbox 360 at PC, itinatampok sa naturang video game si 2-time NBA Champion Le-bron James sa cover.

Mailalaro si King James sa pinakabagong NBA 2k na ‘Lebron James: Path to Greatness’ kung saan makokontrol ang kapalaran ng pinakadominanteng player at matutulungan siyang lampasan ang anim na NBA championships ni Michael Jordan at maaari din siyang igiya sa pagpapatuloy ng Miami Heat dynasty.

Sa pagpapalakas sa offensive sets, mas nagiging makatotohanan ang mga kilos sa laro.

Bukod sa mga legendary teams, makikita din sa NBA 2k14 ang mga European teams kagaya ng CSKA Moscow, Panathinaikos Athens, Olympiacos Piraeus, Electra Tel Aviv at iba pa.

Inilunsad na ng X-Play Online Games Inc, ang exclusive marketers ng NBA 2k Series, ang nasabing video game.