Cebu City mogama og MOC tali sa probinsiya, mga siyudad

CEBU, Philippines — Giaprobahan sa konseho sa Dakbayan sa Sugbo ang resolusyon nga nagtugot kang Acting Cebu City Mayor Raymond Alvin Garcia sa paggama og memorandum of collaboration tali sa Probinsiya sa Sugbo ug sa tulo ka siyudad alang sa pagpahigayon sa Palarong Pambansa 2024.

Ang maong MOC naglakip sa usa ka kasabotan nga ang mga aktibidades sa Palarong Pambansa 2024 ipahigayon dili lang Dakbayan sa Sugbo nga maoy host city sa apan lakip sa mga dakbayan sa Mandaue, Lapu-Lapu, Naga, ug Carcar.

Ang maong resolusyon giaprobahan kini atol sa regular session nga gipahigayon niadtong Miyerkules, Mayo 22, 2024.

Ang nahisgutang resolusyon gipangamahanan kini Acting Vice Mayor, Donaldo Hontiveros, chairman sa committee on sports sa konseho.

Samtang nagkaduol ang pag-host sa Palarong Pambansa 2024 gipalapdan sa Cebu City Government ang ilang preparasyon pinaagi sa pakig-alayon sa mga silingang siyudad ug pipila ka lungsod sa Probinsiya sa Sugbo.

Ang Palarong Pambansa gitawag nga pinakadakong national multi-sporting event nga ipahigayon karong Hulyo 9 ngadto sa 16, 2024.

Sa iyang resolusyon, si Hontiveros nagkanayon nga ang pagpahigayon sa Palarong Pambansa 2024 sa Sugbo usa ka mahinungdanong paagi alang sa tri-cities uban ang component cities ug munisipyo sa Probinsiya sa Sugbo aron ipakita ang ilang hospitality, ilang katawhan ug ilang mga tourist sites ngadto sa mga nagkalain-laing mga delegado gikan sa lain-laing mga rehiyon sa nasud.

Gawas sa Probinsiya sa Sugbo, ang mga dakbayan sa Mandaue ug Lapu-Lapu nipadayag usab sa ilang intention nga mohatag sa ilang suporta ug kooperasyon sa mga kalihokan sa Palarong Pambansa 2024.

Ug aron mahimo kining opisyal usa ka MOC ang himuon nga pirmahan sa opisyales alang sa ilang tagsa-tagsa ka commitment.

Apil usab sa kasabotan nga mag-coordinate ang mga partido sa usa’g-usa sa tanang lugar ug kalihokan sa Palarong Pambansa 2024 ilabi na sa mga aktibidades nga ipahigayon sa ilang tagsa-tagsa ka hurisdiksyon.

Lakip usab sa kasabotan nga ang mga partido maghatag og mga lakang aron masiguro ang promotion ug pagpausbaw sa sports tourism sa ilang mga konstituwente sulod sa ilang mga hurisdiksiyon. — /BDB (BANAT NEWS)