Pipila ka venue sa palaro dunay kausaban

CEBU, Philippines — Adunay gihimo nga kausaban alang sa official playing venue sa nagsingabot nga Palarong Pambansa 2024 nga ipahigayon dinhi sa Dakbayan sa Sugbo sunod buwan.

Ang Chairman sa Cebu City Sports Commission John Pages nibutyag nga mas maayo nga ipahibalo gayud ang mga kausaban aron masayod ang tanan ilabi na sa mga delegado ug sa ilang mga pamilya nga moanhi sa Sugbo alang sa maong kalihukan.

Ang mga kausaban natuki atol sa gihimo nga final technical conference para sa nagsingabot nga Palarong Pambansa niadtong nilabay nga semana nga gitambongan sa mga director sa mga duwa nga nihimo sa ilang katapusang ocular inspection sa mga dapit diin adto himoon ang mga duwa.

Gibutyag ni Pages, atol sa katapusan nga technical conference gihimo ang katapusan nga inspeksyon ug nihimo usab og pipila ka mga pagbag-o base sa ilang mga rekomendasyon.

Pipila sa apektado sa maong kausaban ang mga dapit alang sa basketball 5x5 elementary boys, basketball 3x3 elementary boys football, aero gymnastics, pencak silat, softball, table tennis ug lawn tennis.

Ang basketball 5x5 anha ipahigayon sa University of the Visayas main campus sa downtown Cebu City, diin adto unta kini sa Hoops dome sa Dakbayan sa Lapu-Lapu nga mao nay mo host sa basketball 3x3 nga una unta ipahigayon sa Cebu Eastern College Downtown Cebu City. Aduna pay mga dapit nga gisitar aron gamiton para sa Palarong Pambansa nga giingon nga mao nay final nga venue. (BANAT NEWS)