Duha ka pusher sa Liloan ug Lapu-Lapu sikop sa buy-bust

CEBU, Philippines — Usa ka 35-anyos nga suspetsadong pusher og shabu ang nadakpan atol sa joint buy-bust operation sa Liloan Police Station, Police Intelligence Unit, Provincial Drug Enforcement Unit ug Drug Enforcement Unit diha sa Sitio Bahak, Barangay Poblacion,  Lungsod sa Lilloan sa niaging gabii. 

Ang nasikop mao si Aurilio “Olivo” Tambo-ong, Jr. alyas "Argo",nagpuyo sa Purok Mangga 3, Barangay Poblacion sa nahisgutang lungsod.

Nasakmit gikan sa suspetsado ang

Ebidensya nakuha sa dinakpan mao ang 35 ka gramong shabu nga nikantidad ngadto sa P238,000; P16,000 nga buy-bust money diin ang P500 lang ang tinuod nga kwarta samtang ang 16 kabuok nga tag P1,000 pulos bugos money; ug usa ka grey pouch nga gihimong sudlanan sa ilegal nga drugas.

Ang suspetsado natanggong karon diha sa custodial facility sa Liloan Police Station ug gikatakdang pasakaan og tukmang kaso sa nahimo niyang kalapasan.

Samtang sa Dakbayan sa Lapu-Lapu nasikop ang usa ka lalaki atol usab sa buy-bust operation sa kapolisan sa siyudad diha sa Sitio Kalubihan, Barangay Marigondon sa maong siyudad niadtong Sabado sa gabii.

Ang nasikop mao si alyas “Agu”, 45-anyos, lumulupyo sa Sitio Ylaya sa nahisgutang barangay ug siyudad.

Nasakmit gikan sa suspetsado ang upat ka pakete nga shabu nga nitimbang og lima ka gramo ug nikantidad ngadto sa P40,000 ug P500 nga buy-bust money.

Ang suspetsado natanggong karon sa custodial facility sa LLCPO. Irish L. Laborte (BANAT NEWS)