Kuwang og gibayad sa shabu gipusil sa parok

CEBU, Philippines — Nalandig sa tambalanan ang usa ka 18-anyos nga lalake human kini gipusil sa iyahang barkada kay giingong dili magtarong og bayad sa illegal nga drugas diha sa Sitio Whiteroad, Barangay Inayawan, Siyudad sa Sugbo kagahapon sa kaadlawon.

Ang 18 anyos nga biktima residente sa naasoy nga lugar samtang ang suspek nga barkada sa biktima ug nagpuyo ra sab sa maong lugar ug padayon pa nga gipangita sa kapulisan.

Sa imbestigasyon sa Police Station 7 sa Cebu City Police Office (CCPO) , samtang naglakaw paingon sa ilang panimalay ang biktima, kalit mipatim-aw ug gipusil ang biktima gamit ang wala pa matino nga kalibre sa armas.

Nakadagan pa ang biktima paingon sa ilang balay ug nakapangayo og tabang sa iyahang ginikanan ug dali kining gidala sa tambalanan.

Matud ni Police Major Jiceree Basitao, hepe sa Police Station 7 nga sa impormasyon nga ilang nakuha giingong ang suspek namaligya og ilegal nga drugas,gikatahong kuwang og gibayad ang biktima maong napungot ang suspek ug gipusil kini pagtalikod ug naigo sa liog. —John Mark Dejito (BANAT NEWS)