Fuente Osmeña Circle temporaryong sirad-an

CEBU, Philippines — Sirad-an og 30 ka adlaw sugod niadtong Hunyo 15 ang bahin sa Fuente Osmeña Circle tungod sa nagpadayon nga pag trabaho sa Cebu Bus Rapid Transit Project.

Gipahibawo kini sa Cebu City Transportation Office CCTO diha sa ilang facebook page niadtong Hunyo 14.

Ang mga lugar nga maapektahan mao ang center lanes sa Osmeña Boulevard sa North ug South intersections sa circle ug molungtad ang pagtak-op sa dalan hangtud sa Hulyo 14, 2024.

Ilang girekomendar sa mga motorista nga mogamit og laing mga rota ilabi na panahon sa peak hours nga magsugod sa alas sais sa buntag ngadto sa alas nuybe ug sa peak hours sa gabii gikan sa alas kwatro sa hapon ngadto sa alas siete sa gabii aron malikayan ang kahuot sa dagan sa trapiko.

Si Atty. Kent Francisco Jongoy ang assistant head sa CCTO nibutyag nga kini tungod sa pagpalapad sa karsada sa Osmena Boulevard ug misugyot sa mga motorista nga mogamit ug alternatibo nga rota.

Ang mga driver nga gikan sa Capitol mas maayo moagi sila sa Don Gil Garcia Street, alang sa mga gikan sa south mas maayo sila moagi sa F. Ramos St ug mopadayon ngadto sa Juana Osmena Street.

Nasayran tinguha sa Department of Transportation nga partial nga mahimong operational ang CBRT sa dili pa matapos ang tuig 2024. (BANAT NEWS)