Smarts Sports kampeon sa PSA Cup

MANILA, Philippines – Solidong depensa ang ginamit ng Smart Sports Scribes para gibain ang Capital1 Solar Boys, 49-32, at pagharian ang 2024 Philippine Sportswriters Association (PSA) Cup noong Lunes sa Ninoy Aquino Stadium.

Kinuha ng Spors Scribes ang 12-7 bentahe patungo sa 30-12 pagbaon sa Solar Boys sa second quarter sa kanilang winner-take-all contest.

Hindi na binitawan ng Smart na sinuportahan ni Danny Espiritu, ng Headstart Sports Academy at BaliPure ang nasabing kalamangan sa Capital1 na kanilang pinalobo sa 41-21 mula sa basket ni SPIN.ph editor-in-chief Dodo Catacutan.

Hinirang si Reuben Terrado ng Spin.ph bilang Finals Most Valuable Player (MVP) matapos humakot ng 12 points at 11 rebounds, habang nagdagdag si Cignal bigman AJ Bolando ng 13 markers, 8 boards at 5 assists.

Umiskor sina Christian Jacinto at Bryan Ulanday ng tig-10 points at may 8 markers si Aldo Aviñante sa panig ng Capital1 na itinaguyod nina team owners Mandy at Milka Romero kasama si Bulakan Mayor Vergel Meneses, ang Uratex at Rebel Sports.

Samantala, inangkin ng Strong Group Athletics Press Row Bros ang third place trophy mula sa 82-81 overtime win sa Say Chiz Smileys.

Sa pre-game ceremony na dinaluhan ni Samahang Basketbol ng Pilipinas Executive Director Erika Dy ay hinirang na tournament MVP si Jonas Terrado at nakasama sa Mythical Five sina Bolando, Aviñante, Lopez at Jacinto.

Kinilala si Eugene Flores ng SGA bilang top rookie at si Delfin Dioquino ng Rappler ang top defensive player, samantalang iginawad kay Reuben Terrado ang 1st Joe Antonio Sportsmanship award.

Itinanghal si PSA President Nelson Beltran ng Smart bilang best senior player sa torneong sinuportahan ng Shakey’s at ACES.