15 pamilyang nasunugan, inayudahan ng Muntinlupa LGU
MANILA, Philippines — Nasa 15 pamilya ang naapektuhan sa sunog na naganap sa isang residential area, sa Manatra, Barangay Buli, Muntinlupa City, Lunes ng gabi.
Umakyat lang sa ikalawang alarma ang sunog na nagsimula alas-6:56 ng gabi at idineklarang fire-out alas-8:00 ng gabi ng Agosto 19.
Nabatid na unang sumiklab ang apoy sa kusina ng bahay ng isang John Balisi at pamilya nito sa Manatra, Brgy. Buli na kumalat sa mga katabing bahay, ayon sa ulat ng Fire Department III-Muntinlupa City Fire Station.
Nasa kabuuang 500 sqm ang kinatatayuan ng apektadong mga kabahayan kung saan tinatayang nasa P175,000.00 ang halaga ng ari-ariang natupok ng apoy.
Walang nasaktan o nasawi sa insidente
Umabot naman sa 40 truck ng bumbero ang rumesponde mula BFP, LGU at fire volunteers at mga ambulansya.
Inilikas ang mga apektadong pamilya sa covered court ng Brgy. Buli, na agad na pinuntahn ni Mayor Ruffy Biazon para alamin ang sitwasyon ng gabing iyon at ipinahanda ang hot meals.
Kahapon, Martes ay nagsasagawa ang Social Services Department (SSD) ng site mapping, assessment, at interview para maipamahagi ang Disaster Assistance Family Access Card (DAFAC).
Inihahanda na rin ang emergency relief kits na ipinamahagi sa mga nasunugan.
- Latest