Smuggled agricultural goods sa Navotas, nakumpiska ng BOC at DA

MANILA, Philippines — Milyun-milyong ha­laga ng iba’t ibang uri ng mga hinihinalang puslit na agricultural products ang nakumpiska ng mga tauhan ng Bureau of Customs (BOC) at Department of Agriculture (DA), sa isinagawang anti-smuggling operation sa Dagat-dagatan, Navotas City, nabatid kahapon.

Nauna rito, nakatanggap ang BOC ng intelligence information mula sa isang confidential informant kaugnay sa isang compound na hinihinalang nagtatago ng smuggled agricultural products kaya’t sa tulong ng DA ay kaagad na nag­lunsad ng surveillance operation.

Noong Agosto 15, sa tulong ng Northern Police District-Navotas Police Station at local barangay officials, nag-inspeksiyon ang grupo sa lugar at nadiskubre doon ang dalawang cold storage units na naglalaman ng iba’t ibang uri ng agricultural goods na galing sa China.

Isa sa mga cold sto­rage unit ay naglalaman ng 132.75 tonelada ng puting sibuyas, na nagkakahalaga ng P21.2 milyon, habang ang isa pa ay mayroong nakaimbak na 89.89 tonelada ng imported carrots, na nagkakahalaga ng P13.48 milyon. Nadiskubre rin ang 360 kilo ng kamatis, 10 kilo ng enoki mushrooms, at 92.25 tonelada ng imported white onions na nasa isang 40-foot container van.

Inimbak umano doon ang mga naturang goods nang hindi nagbabayad ng kaukulang duties at taxes sa pamahalaan kaya’t kaagad na sinel­yuhan ng BOC ang mga warehouse upang i-secure ang mga nakumpis­kang items, sa tulong ng Business Permit and Licensing Office (BPLO) staff, SWAT teams, at barangay representatives.

“This successful ­operation is a testament to our relentless effort to crack down on the smuggling of agricultural products,” ayon kay BOC Commissioner Bienvenido Y. Rubio.

Sinabi naman ni Customs Intelligence and Investigation Service (CIIS) Director Verne Enciso na tumanggi ang warehouse owners, representatives, lessees, lessors, o occupants na tanggapin ang Letter of Authority (LOA) na inisyu ng commissioner.

“Because the warehouse representatives refused to acknowledge the LOA, they resorted to forcing open the inner gate door of the cold storage and container doors,” aniya.

Pinuri naman ni Intelligence Group Deputy Commissioner Juvymax Uy ang operasyon at binigyang-diin ang kahalagahan ng isang whole-of-government approach upang sugpuin ang smuggling sa bansa.

Ang may-ari at mga kinatawan ng mga cold storage facilities ay maaaring maharap sa kasong paglabag sa Section 1400 (misdeclaration in goods declaration) at Sec. 117 (regulated importation) in relation to Section 1113 (property subject to seizure and forfeiture) ng Republic Act No. 10863, o mas kilala sa tawag na Customs Modernization and Tariff Act (CMTA).