Operasyon ng LRT-2, nalimitahan dahil sa taong-grasa
![Operasyon ng LRT-2, nalimitahan dahil sa taong-grasa](https://media.philstar.com/photos/2024/08/16/4_2024-08-16_21-51-48.jpg)
MANILA, Philippines — Nilimitahan ng pamunuan ng Light Rail Transit Line 2 (LRT-2) ang kanilang operasyon dahil sa pagpasok ng isang taong- grasa sa viaduct, na matatagpuan sa pagitan ng dalawang istasyon nito sa area ng Maynila kahapon ng umaga.
Sa abiso ng Light Rail Transit Authority (LRT) na siyang nangangasiwa sa operasyon ng LRT-2, nabatid na madaling araw nang mamataan ang taong grasa sa viaduct, sa pagitan ng Pureza at Legarda Station sa Maynila.
Dakong alas-5:59 ng umaga naman ay kaagad nang inanunsiyo ng LRTA ang implementasyon ng provisionary service o limitadong operasyon ng mga tren, mula Antipolo Station hanggang V. Mapa Station lamang sa Sta. Mesa, Maynila at pabalik.
“Pansamantalang nagpapatupad ng provisionary service ang LRT-2 dahil sa isang taong grasa na kasalukuyang nasa viaduct sa pagitan ng Pureza at Legarda station,” abiso ng LRTA. “Ang biyahe ng tren ay mula Antipolo station hanggang V.Mapa station lamang at pabalik.”
Samantala, dakong alas-7:18 naman ng umaga nang ianunsiyo ng LRTA na balik na sa normal ang operasyon ng buong linya ng LRT-2 matapos na matagumpay na masagip ang taong grasa.
- Latest