Impeach trial ni VP Sara ratsada tapos SONA - Chiz

MANILA, Philippines —  Malamang na magsimula ang impeachment trial ni Vice President Sara Duterte pagkatapos ng State of the Nations Address (SONA) sa Hulyo 21 sa ilalim ng 20th Congress, ayon kay Senate President Francis “Chiz” Escudero nitong Lunes.

Bagaman at magbabalik ang sesyon ng Senado sa Hunyo 2, magkakaroon naman ng “Sine Die Adjournment” hanggang Hulyo 27 kung kailan gaganapin ang SONA ni Pangulong Ferdinand Marcos Jr. at pormal na papasok ang 20th Congress.

“Malamang kapag pumasok na ang bagong Kongreso sa mga tungkulin nito. Ibig sabihin pagkatapos ng SONA. So I think SONA is on July 21 (sic). So trial will commence after that date,” ani Escudero.

Wala rin aniyang dahilan para magpatawag ng special session para sa paglilitis kay Duterte.

“Sinabi ko na pong wala akong intensyon na humiling ng special session sa Presidente. Hindi ito isa sa mga bagay na dahilan para magpatawag ng special session ang Senado,” ani Escudero.

Ayon pa kay Escudero, puwedeng lumapit sa Supreme Court ang sinuman upang kuwestyunin kung maaari bang ang mga senador ng 20th Congress ang lilitis kay VP Sara gayong ipinasa ang Articles of Impeachment sa 19th Congress.

“Malayang pwedeng magtanong…pero anong gusto nilang gawin namin? Finish or not fi­nish pass your paper. Ano ito exam ng grade three? Hindi  pa tapos magpresenta ng testigo ‘yung prosekusyon at depensa dahil Hunyo 30 na, ‘Oh , pagbotohan na natin to” o “oh, dismiss na natin to,’  ganun?” tanong ni Escudero.

Wala anyang nakasaad sa 1987 Constitution na maaaring magpatawag ng isang espesyal na sesyon ang Kongreso para magsagawa ng impeachment trial, ayon pa kay Escudero.

Idinagdag ni Escudero na hindi niya papansinin ang mga partisan na posisyon sa impeachment dahil pinipilit ng ilang quarters ang Senado na simulan ang paglilitis sa pamamagitan ng isang espesyal na sesyon.

Inihalimbawa ni Escudero ang paglilitis sa mga kaso nina dating Pangulong Joseph Estrada, dating Ombudsman Merceditas Gutierrez at dating Chief Justice Renato Corona na hindi rin naman agad-agad sini­mulan ng Senado.