Casino dealer nabukong nagtatago ng gaming chips sa medyas

MANILA, Philippines — Bagsak sa kulungan ang isang 23-anyos na casino dealer matapos mahagip ng CCTV ang pagnanakaw ng gaming­ chips na itinago sa medyas sa isang casino sa Pasay City, nitong Miyerkules.

Nahaharap sa reklamong Qualified Theft ang suspek na si alyas “John”, matapos arestuhin ng duty security officer na nakatuklas sa ginawang krimen.

Sa ulat, alas-4:07 ng madaling araw nang mamonitor sa CCTV ang ginawang pagtatago ng 2 pirasong gaming chips ng suspek sa medyas na suot nito.

Nang sitahin, kusa nang ibinalik ng suspek ang ninakaw na chips subalit tinuluyan pa rin ang pagsasampa ng pormal na reklamo ng kinatawan ng casino.

Isasailalim sa inquest proceedings ang suspek sa City Prosecutor’s Office ng Pasay City.