BEST kumana ng 38 golds sa PAI swimfest
MANILA, Philippines — Tumataginting na 38 ginto, 23 pilak at 10 tansong medalya ang ibinulsa ng Behrouz Elite Swimming Team (BEST) sa 2024 PAI National Age Group Championships sa Teofilo Yldefonso Swimming Pool sa Manila.
Tinapos ng BEST ang ratsada matapos umani ng karagdagang 13 ginto, pitong pilak at limang tansong medalya sa huling araw ng kumpetisyon.
Itinanghal na Most Outstanding Swimmer (MOS) ang apat na miyembro ng BEST sa pangunguna ni Mikhael Jasper Mojdeh na winalis ang lahat ng 10 ginto nito sa Class A boys’ 9-year division.
Hataw ng ginto si Mikhael Jasper sa 50m butterfly (38.60), 100m freestyle (1:16.98), 100m breaststroke (1:51.66), 200m freestyle (2:45.76), 100m butterfly (1:34.70), 50m backstroke (39.94), 100m breaststroke (1:51.00), 200m IM (3:09.00), 50m freestyle (35.11) at 100m backstroke (1:23.90).
Kasama rin sa mga MOST winners sina Madi Mojdeh sa Class A boys’ 13-year, Elisa De Kam sa Class A girls’ 13-year at Yugo Cabana sa Class A boys’ 14-year.
Umani ang Immaculate Heart of Mary College-Paranaque pride na si Madi ng siyam na ginto at dalawang pilak, habang naglista si De Kam ng apat na ginto, limang pilak at isang tanso.
Manigning din si Cabana na may anim na ginto, dalawang pilak at isang tanso para masiguro ang MOS award sa kanyang kategorya.
- Latest
