Brazilian import kinuha ng Galeries
MANILA, Philippines — Itatampok ng Galeries Tower si Brazilian import Monique Helena para sa darating na 2024 Premier Volleyball League (PVL) Reinforced Conference.
Ito ang unang international stint ng 22-anyos na outside hitter at inaasahang makakatulong sa kampanya ng Highrisers.
Unang sumabak sa mga torneo si Helena noong 2017 para sa Lavras Vôlei kasunod ang paglalaro sa Itambé/Minas, Minas Náutico, Bluvolei Furb SME, Vôlei Taubaté at ABEL Moda Volei.
Bukod kay Helena, ang iba pang imports na sasalang sa PVL Reinforced Conference ay sina Erica Staunton (Creamline), Zoi Faki (Choco Mucho), Khat Bell (Chery Tiggo), Elena Samoilenko (PLDT Home Fibr) at Marina Tushova (Capital1 Solar Energy).
Hinugot naman ng Galeries Tower sina free agents Roselle Baliton at Shannen Palec sa off-season.
Hangad ng Highrisers na mapaganda ang 10th place finish sa nakaraang 2024 All-Filipino Conference kung saan sila nagtala ng 3-8 record.
Inaasahang lalakas pa ang Galeries Tower sa pagkuha ng mga rookies at free agents sa darating na 2024 PVL Draft.
Hawak nila ang No. 3 overall pick.
Nakatakda ang kuna-unahang VL Rookie Draft sa Hulyo 8 sa Novotel na dadaluhan ng 12 teams.
- Latest
