PBA Rookie Draft: Converge mipili ni Baltazar nga No.1 overall pick
CEBU, Philippines — Wala nay surprisa nga nahitabo.
Kini human ang paboritong si Justine Baltazar gilabni sa Converge FiberXers isip No.1 overall pick sa PBA Season 49 Rookie Draft kagahapong adlawa (Dominggo, Hulyo 14) didto sa Glorietta Activity Center sa Makati City.
Ang talentadong big man gipaabot nga makatabang og dako sa Converge nga nangiwit sa PBA Commissioner’s ug Philippine Cup.
Sa miaging season, ang FiberXers miposte og tulo lamang ka daog. Sa pagdugang nila ni Baltazar sa ilang puwersa, duna nay katumpang ang sinaligan nga sentro sa Converge nga si Justin Arana.
“Sobrang excited ako sa bagong team ko,” matud pa ni Baltazar. “Last year, kulang sila sa big man, walang katulong (si Arana)so magiging maganda.”
Masaligon kaayo si Baltazar nga iyang mahatag kon unsa man gani ang kuwang sa FiberXers.
Ang player nga sama niya og kalibre maoy gipangita ni coach Aldin Ayo hinungdan nga si Baltazar maoy gikuha sa Converge sa way pagduha-duha.
Ang Blackwater Bossing mibira ni Sedrick Barefield isip No. 2 pick, samtang ang Barangay Ginebra milabni ni RJ Abarrientos isip 3rd overall.
- Latest
