Tanang Pinoy Paris Olympians makadawat og milyones nga insentibo

CEBU, Philippines — Malipayon sa nakab-ot nga kalamposan sa Pilipinas sa bag-ohay pang natapos nga Paris Olympics,  si Presidente Bongbong Marcos mibubo og insentibo dili lamang nilang double-gold winner Carlos Yulo ug bronze medalists Aira Villegas ug Nesthy Petecion apan hasta sab sa ubang Pinoy nga mga atleta nga mikumbati sa labing bongga nga pasundayag sa paugnat sa kusog sa tibuok kalibutan.

Si Marcos mihatag ni Yulo og P20 million nga bonus tungod sa paglangkat sa garbo sa Leveriza, Manila og makasaysayanong duha ka gold medals sa floor exercise ug vault sa men's artistic gymnastics.

Gitupngan sab ni Marcos ang P2 million nga madawat nilang Villegas ug Petecio sa pagsakmit nila og bronze medals gikan sa boxing event.

Apan ang labing nindot nga balita naabot sa dihang si Marcos namahayag nga kadtong wala makadaog og medalya hatagan og P2 million nga pahalipay matag usa.  Ang P1 million niini gikan sa kaugalingong bulsa ni BBM, samtang ang laing P1M magagikan sa Philippine Sports Commission.

“I thought that we should really recognize all the athletes. I think any athlete, kahit sino atleta na mapag-qualify sa Olympics, mabigat yun, that is extremely difficult thing to manage,” matud pa ni Marcos atol sa welcome ceremony nga iyang giandam alang sa mga atletang Pinoy didto sa Malacañang niadtong Martes sa gabii.

“Tamang tama, andito si chairman,” dugang pa ni Marcos diin ang gipasabot si PSC chair Richard Bachmann. “Lahat bibigyan nating ng tig iisang milyon from the PSC na ima-match pa ng Office of the President.”

Ang tanang mga coaches aduna say makubra nga P500,000 matag usa agi'g pasalamat ni Marcos sa ilang pagsakripisyo ug paggiya aron mamahimong kampiyon ang tagsa-tagsa nila ka mga atleta.