CESAFI Season 24 CRMC Mustangs mosalida sa pasiunang mga duwa

CEBU, Philippines — Ang Cebu Roosevelt Memorial Colleges (CRMC) Mustangs mokumbati sa pasiunang mga duwa sa Cebu Schools Athletic Foundation, Inc. (CESAFI) Season 24 karong Septiembre 21 diha sa Cebu Coliseum.

Sa buena manong aksiyon, ang Baby Mustangs ubos sa pagtimon ni coach Serg Alburo mo-debut sa high school division sa primerong inter-school nga liga sa Sugbo batok sa Cebu Eastern College (CEC) Blue Dragons.

Human niini, ang mga maguwang nila sa college level makigsangka sa Benedicto College Cheetahs sa main game.

Sa miaging tuig, ang Mustangs ni coach Paul Alelu Flores, nga usa ka two-time UAAP champion atol sa mabulokon niyang panahon uban sa Far Eastern University (FEU) Tamaraws, nanamilit bitbit ang desenteng 4-6 win-loss rekord sa una nilang pagsalida sa CESAFI.

Ning higayona, ang Mustangs naglaraw nga makatikang sa Final Four. Bisan nawad-an og tulo ka mga sinaligan nga sila si Kin Dayday, Jerome Arboiz, ug Kurt Almendras, si Mustangs team manager Marc Malazarte masaligon nga makabp-ot nila ang ilang misyon uban sa tabang sa bag-o nilang nabira nga mga players nga siola si Earl Laniton, Jericho Montecalvo, Jack Roa, Franz Aballe ug Carl Torion, nga anak ni kanhi PBA star Jimwell Torion.    Dugang niini, anaa pa gihapon sa poder sa Mustangs ang labing lig-on nilang pambato nga sila si Paulo Dalumpines ug Keaton Taburnal nga mobarog isip lider sa nagpabilin nilang mga batos nga sila si Wes Malazarte, James Gelig, Red Recimiento, Jonathan Vanguardia, Jhay Castro, Yzah Dugaduga, Jray Casinillo, Junel Colubio, Dale Otero, ug Lawrence Cacanog.

"We will come prepared every game and give the CESAFI and of course the Mustangs fans a good showing each time we hit the court," dason pa ni Malazarte, nga mao sab ang Athletic Director sa CRMC. "Considering this is the last dance for coach Alelu and me, we will be giving our all hoping for a Final Four finish."