Mga Amerikanong basketball players mibisita sa The Freeman

CEBU, Philippines — Usa ka grupo sa mga basketball players gikan sa nagkadaiyang dapit sa Amerika ubos sa bandera sa Sirius Star Pilipinas ang mibisita sa buhatan sa The Freeman, igsoong mantalaan sa Banat News, kagahapong adlawa, Septiyembre 11.

Ang mga Amerikanong baskebolista nga mitikang sa labing karaan nga mantalaan sa Sugbo mao sila si Anthony Winningham, Aaron Castro, Jaylen Swan, Zjateek Conyers, Xanthanus Pierro, Tyler Neufeld, Jarell Cowell, Dan Ricard, London Cobbs, Devonne Mayrant, Jevon Williams, ug Gerard Mantua. Mainiton silang gidawat ni TF General Manager Melandro "Bhoy" Mendoza.

Gipangulohan sa Sugbuanon nilang coach nga si Albert Alocillo, ilang gipaambit ang maanindot nilang kasinatian pagsalmot sa malampuson nga Allied Network Solutions (ANS) 3x3 Basketball Tournament Season 2 niatong weekend didto sa Sisters of Mary School-Boystown sa Barangay Tungkop, Minglanilla.

Gipadayag nila ang ilang pagdayeg sa pagmahal sa mga Pinoy sa basketbol ingon man ang ilang pagkamapabsanon ug kahanas sa pagduwa sud sa korte,

Giduyogan sila sa mga kadagkuan sa ANS nga sila si Jay Fernandez, Aris Gil Prieto ug Marvin Aller, nga naglantaw sa unahan ngadto sa mas nindot ug mas dako nga 3x3 event sa umaabot.