Celtics 3-0 na vs pacers, nanoktok sa NBA finals
CEBU, Philippines — Si Jayson Tatum mipabuhagay og 38 puntos sa dihang ang Boston Celtics dalaygong mibangon human mabiyai og 18 puntos aron pakagingon ang Indiana Pacers, 114-111, ug pagposte og 3-0 nga bentaha sa NBA Eastern Conference finals kagahapon didto sa Gainbridge Fieldhouse sa Indianapolis, Indiana.
Gawas sa eksplosibo niyang opensa, si Tatum mipupo sab og 10 ka rebounds ug mipasa og walo ka assists. Si Jaylen Brown midugang og 24 puntos alang sa Celtics, nga nanginahanglan og usa na lang ka daog aron langkaton ang East title ug ingon man mo-abante sa NBA Finals.
Makab-ot kining duha sa Celtics og ugaling ma-sweep nila ang Pacers karong Martes.
"Closeout games are the hardest," matud pa ni Tatum, agi'g padayag nga dili sila angayan mokompiyansa bisan sa dako kaayo nilang labaw.
Sa kasaysayan sa NBA, wala pay team nga nakabangon human malubong og 3-0 sa usa ka best-of-seven series.
Bisan og wala ang sinaligan nilang si Tyrese Haiburton, ang Pacers determinado nga makabawos sa Celtics didto sa ilang korte.
Timaan niini, milabaw pa sila og 18 puntos sa tunga-tungang bahin sa ikaduhang kuwarter.
Apan mikolapso sila taliwala sa mainit nga resbak sa Celtics.
Ang lima ka sagunson nga puntos ni Jrue Holiday sa pinal nga 38.9 segundos maoy naghatud sa Celtics ngadto sa kulbahinam nga kadaogan.
Si Andrew Nembhard maoy nangu sa Pacers uban ang 32 puntos ug siyam ka assists. Sila si Pascal Siakam ug Myles Turner mitali og 22 puntos matag usa sa pilderong kawsa.
- Latest
