Doncic mi-aswat sa Mavs ngadto sa 2-0 nga labaw

CEBU, Philippines —  Si Luka Doncic milansang og makapakurat nga 3-pointer sa pinal nga 3.8 segundos aron agakon ang Dallas Mavericks ngadto sa laing kulbahinam nga daog batok sa Minnesota Timberwolves, 109-108, sa Game 2 sa NBA Western Conference finals kagahapon didto sa Target Center sa Minneapolis, Minnesota.

Ang tadhang Slovenian All-Star guard mirehistro og triple-double uban ang 32 puntos, 10 ka rebounds, ug 13 ka assists aron tabangan ang Mavs pagposte og 2-0 nga bentaha sa ilang best-of-seven series.

Dalaygon kaayo ang Mavs nga mibangon human malubong og 18 puntos sa ikaduhang kuwarter aron pakauwawan ang Wolves atubangan sa bagang panon sa ilang fans sa ikaduhang sunod-sunod nga higayon.

Si Kyrie Irving bugnaw kaayo ang sinugdanan apan mikadlit og 13 sa iyang 20 puntos sa katapusang kuwarter nga nakaambag og dako sa impresibong pagbalitok sa Mavs.

Ang Wolves abante unta og singko puntos, 108-103, sa nahibilin nga 1:29 sa duwa apan si Irving miposa og tres aron pagpaduol sa Mavs ngadto na lang sa dos puntos.

Human sa usa ka timeout, si Doncic miwani ni Rudy Gobert dayong bugha sa gitira niining krusyal tres nga nagtukmod sa Mavs ngadto sa makapaisa'g balahibo nga daog.

Si Naz Reid, nga mipasud og pito sa siyam niya ka tres, duna pa untay katapusang tsansa aron padag-on ang Wolves apan ang gibuhian niyang 3-pointer igo lamang mihawok sa ring.

Si Daniel Gafford miamot og 16 puntos ug lima ka blocks, si P.J. Washington mi-iskor og 10 samtang si Dereck Lively midonar og 14 puntos alang sa Mavs. Si Anthony Edwards mipupo og 21 puntos, lima ka rebounds ug pito ka assists alang sa Wolves apan mipasud lamang og lima sa 17 niya ka mga itsa.

Si Mike Conley dunay 18 puntos, si Gobert midugang og 16 puntos ug 10 ka rebounds samtang si Karl-Anthony Towns mihipos og 15 puntos sa pilderong Wolves.-