Brown misidlak, Celtics 2-0 na

CEBU, Philippines — Si Jaylen Brown mipabuto og 40 puntos sa dihang gilampaso sa Boston Celtics ang Indiana Pacers, 126-110, aron pagposte og 2-0 nga bentaha sa best-of-seven NBA Eastern Conference finals kagahapon didto sa TD Garden sa Boston, Massachusetts.

Sikit unta ang duwa sa sinugdanan apan si Brown mibubo og 10 puntos sa 20-0 nga bomba nga nakapalabaw sa Celtics sa hingpit sa ikaduhang kuwarter.

Mikuha sab og atensiyon sila si Jayson Tatum ug Derrick White nga parehong mitali og 23 puntos ingon man si Jrue Holiday nga mipupo og 15 puntos ug mipasa og 10 ka assists alang sa Celtics, nga manulong sa kampo sa Pacers sa Game 3 karong Domingo.

Ang Celtics mi-abante og 15 puntos, 42-27, sa tunga-tungang bahin sa ikaduhang kuwarter.

Igo lamang nakasikit ang Pacers ngadto sa singko puntos, 51-56, atol sa halftime gumikan kay ang Celtics miresbak pinaagi sa nagkayong 16-5 rally aron inaton og balik ang ilang labaw ngadto sa 13 puntos padung sa pinal nga 12 minutos sa aksiyon.

Taliwala sa ikaduhang sunod-sunod nga kapildihan, nasamotan pa ang kalbaryo sa Pacers gumikan kay nakahiagum og angol ang pambato nga si Tyrese Haliburton, nga mibiya sa ikatulong kuwarter ug wala na makabalik pa.

Tungod niii, si Haliburton nalimitahan ngadto lamang sa 10 puntos ug walo ka assists.

Si Paskal Siakam maoy nangu sa pilderong Pacers bitbit ang 28 puntos.