Sarno maraming pinagdaanan bago maabot ang Paris Olympics slot
MANILA, Philippines — Ibinahagi ni weightlifter Vanessa Sarno ang paghihirap nito bago maabot ang inaasam na tiket sa Paris Olympics.
Sariwa pa si Sarno sa matamis na pagkopo ng silya sa kanyang kauna-unahang Olympics matapos ang impresibong ipinamalas nito sa IWF World Cup na ginanap sa Phuket, Thailand.
Maraming pinagdaanan si Sarno kung saan dugo’t pawis ang naging puhunan nito para maisakatuparan ang minimithing tagumpay.
Kaya naman hindi maitago ni Sarno ang saya dahil nagbunga ang lahat ng kanyang pagsisikap.
“Maraming taong nagdoubt, maraming taong sumira, maraming masasakit na salita akong natanggap, maraming taong nagjudge, maraming criticism akong natanggap, maraming hindi magagandang kwento na lumabas about sa akin, chismis, issue at iba pa,” ani Sarno.
Aminado si Sarno na hindi madali ang buhay atleta.
Maraming pagsubok na darating ngunit kailangang maging matatag para malampasan ito.
Hindi nakaligtas si Sarno sa mga ganitong pagsubok.
At malaki ang pasasalamat nito sa mga taong patuloy na naniniwala at sumusuporta sa kanya.
“Life and experience of being an athlete has always been hard. I have tried various things to make myself motivated no matter how big the waves of challenges and problems are crashing upon me,” ani Sarno.
May mga pagkakataon na gusto na sumuko ni Sarno subalit hindi ito bumibitiw dahil pangarap nito ang patuloy na mabigyan ng karangalan ang bansa.
Sesentro na ang atensiyon ni Sarno sa paghahanda nito para sa Paris Olympics.
- Latest