Brownlee sasabak agad sa IBL
MANILA, Philippines — Kaagad na sasalang si Justin Brownlee bukas para sa three-time champion Pelita Jaya Basketball Club sa Indonesia Basketball League (IBL).
Babanderahan ng Gilas Pilipinas naturalized guard at Barangay Ginebra resident import ang Pelita Jaya, may 7-1 record sa elimination round, sa pagsagupa sa Rans Simba.
May basbas ng Ginebra management at Gilas ang pansamantalang paglalaro ng six-time PBA champion import sa Indonesian league bilang preparasyon niya sa darating na FIBA Olympic Qualifying Tournament sa Hulyo.
Tinulungan ni Brownlee ang Gilas sa pagkopo sa gold medal ng nakaraang 19th Asian Games sa Hangzhou, China. Pinagbidahan din niya ang mga panalo ng Nationals sa Hong Kong at Chinese Taipei sa first window ng FIBA Asia Cup Qualifiers.
Makakatuwang ng 35-anyos na si Brownlee sa kampanya ng Pelita Jaya sa IBL sina dating PBA imports KJ McDaniels at Thomas Robinson.
Isinuot ni McDaniels ang mga uniporme ng TNT Tropang Giga, Meralco at NLEX sa PBA simula noong 2019 hanggang 2023 habang kumampanya si Robinson para sa Road Warriors bago ang biglaang pag-uwi sa nakaraang Commissioner’s Cup.
- Latest
