Brownlee maglalaro sa Indonesian League
MANILA, Philippines — Sa Indonesia naman sunod na magpapasiklab ang Gilas Pilipinas naturalized player at resident PBA import ng Barangay Ginebra na si Justin Brownlee.
Kinumpirma ni Brownlee kamakalawa ng gabi matapos manood ng Premier Volleyball League (PVL) sa Philsports Arena sa Pasig City ang susunod na plano sa Indonesia Basketball League (IBL) bagama’t hindi pa sinabi kung para saang koponan.
Bukas aalis si Brownlee at maglalaro sa Indonesia hanggang sa Hunyo.
Sakto ito sa pagbabalik ng training camp ng Gilas sa naturang buwan para maghanda sa FIBA Olympic Qualifying Tournaments sa Hulyo na daan patungo sa Paris Olympics.
Paraan ito ng pagpapanatili ni Brownlee sa kundisyon habang wala pang laro ang Gilas pati na ang kanyang mother team na Ginebra sa PBA, ayon na rin sa abiso ni Gilas at Ginebra mentor Tim Cone.
Kasalukuyang nagdaraos ng Philippine Cup ang PBA ngayon na wala munang imports kaya bakante si Brownlee upang maglaro sa iba.
Hindi nakalaro si Brownlee para noon ay reigning champion na Ginebra sa katatapos lang na Commissioner’s Cup dahil tinapos muna niya ang tatlong buwang suspensyon matapos ang isyu ng doping pagkatapos ng Asian Games.
Ginabayan ni Brownlee sa gintong medalya ng Asian Games ang Gilas at bago iyon ay dinala ang Ginebra sa Commissioner’s Cup championship matapos talunin ang guest team na Bay Area sa Game Seven sa harap ng PBA record crowd na 54,589 fans sa Philippine Arena sa Bocaue, Bulacan.
Opisyal na nagbalik sa aksyon ang 35-anyos na pambato noong nakaraang buwan para sa Gilas na tinambakan ang Hong Kong, 94-64, at Chinese Taipei, 106-53, para sa liderato ng Group B ng FIBA Asia Cup 2025 Qualifiers tampok din ang New Zealand.
Bago maglaro sa Pilipinas at sa Indonesia ay sumalang na rin dati si Brownlee sa NBA G-League, Mexico, Italy, Lebanon, United Arab Emirates at ASEAN Basketball League.
- Latest