Brazilian, Kenyan mihari sa XTERRA Trail Run

CEBU, Philippines - Si Andrea Bess sa Brazil ug Abraham Missos sa Kenya ang nidominar sa tagsa-tagsa nila ka dibisyon sa 21K premiere sa 2012 XTERRA Trail Run kagahapon didto sa Amara subdivision sa Liloan, Cebu.

 Si Bess maoy nanghawod sa 21K women's class human niya gitapos ang dagan sud sa usa ka oras, 52 minutos ug 25 segundos. Nagsunod niya ang laing langyaw nga si Aileen Mary Breen, kinsa mioras og 1:52.55, samtang ang Sugbuanang si Merlita Arias Dunkin mikapyot sa ikatulo sa oras nga 1:57.35.

Sa iyang bahin, si Missos kinsa pirmeng manghawod sa mga fun run dinhi sa Sugbu mao sab ang naghari sa men's 21K division sa iyang oras nga    1:14.49. Ang Kenyan nga si Douglas Mbui (1:15.50) ug Sugbuanon nga si Bonifacio Monjas (1:16.37) maoy miangkon sa ikaduha ug ikatulo nga dapit.

Laing beteranang runner nga si Madelyn Carter (57:56) maoy milangkat sa 10K title dihang iyang napuhalan silang Charlotte Thepauh (1:00.00) ug Amale Jopson (1:08.49).

Samtang ang Kenyan nga si Josphat Kiptanu (49:24) maoy naghari sa 10K run batok nilang Mendel Lopez (49:35) ug Rodolfo Mediquillo (55.14).

Sila si Rochelle Tan (18:37.10) ug John Cliff (14:39.00), maoy miangkon sa titulo sa 5K division.  (BANAT SPORTS)