Rain or Shine kaging sa Meralco

CEBU, Philippines - Nameligro nga dili makaabante sa playoffs ang Rain or Shine Elasto Painters human sila makahiagum sa ikalima nilang kapildehan sa kamot sa Meralco Bolts, 93-84, kagabii sa PBA Commissioner’s Cup didto sa Smart Araneta Coliseum.

Ang Painters misulod sa Final 4 sa miaging All-Filipino Cup, apan wa damha nga mabutang sila karon sa lisud nga sitwasyon tungod kay nangiwit sila sa standing sa ilang 1-5 win-loss record.

Wala gyud katilaw og labaw ang Painters batok sa Meralco nga gipangulohan sa ilang import og ex-NBA cager nga si Earl Barron kinsa mirehistro og double-double nga 29 puntos ug 22 ka rebounds.

Ang Meralco (3-4) mitukod sa labing daku nilang labaw sa third period, 68-46, sa 5:14 sa third period, apan gihinay-hinay kini pagpahak sa Painters hangtud nga minaog sa tres puntos, 83-80, sa katapusang tres minutos sa duwa.

Si Buenafe maoy miduslit sa scoring rally sa Painters sa final period, apan wala kini musalir dihang dali kining gialkontra nila ni Mac Cardona ug Chris Ross kinsa mipatusak sa tagsa-tagsa nila ka free-throws.

Si Cardona miiskor og 25 puntos alang sa Meralco. Ang import sa Painters nga si Duke Crews adunay 21 puntos ug 14 rebounds, samtang si Buenafe miamot og 12 puntos.  - BANAT NEWS