'Prince' Pagara isugal sa ALA Promotions

CEBU, Philippines - Atubangon na ni ALA super flyweight prospect Albert 'Prince' Pagara ang usa ka hagit nga posibleng sayo ra kaayo alang sa iyang batan-ong career batok ni Tanzanian Shabani Madilu sa undercard sa "Pinoy Pride 9" karong Sabado didto sa   University of St. La Salle Gym, Bacolod City.

Si Pagara, 17-anyos, ang napilian nga mohulip sa lugar ni Arthur Villanueva, kinsa napugos pag-atras sa gikatakdang away human makahiagom og injury usa ka semana sa dili pa ang away.

Sa interbiyu sa telepono, si ALA Promotions CEO Michael Aldeguer miangkon nga dakung sugal ang ilang buhaton sa pagparang ni Pagara batok ni Madilu.

"Some don’t want to risk in giving their boxers a tough fight, but we have a responsibility for the viewing people and I think a fight like this will be good for Philippine boxing," matud pa ni Aldeguer. "We will have to take a risk and this will be a break for Pagara and lets see if he can make it or not."

Ang kanhi amateur sensation nga kaniadto gitanyagan og luna sa National team adunay perpektong rekord nga 7-0, 6KOs, samtang ang Tanzanian super flyweight nga si Madilu nagkupot og rekord nga 12-6,6KOs.

Sama sa mga giagian nila ni ALA fighters AJ Banal, Rey Bautista ug Rocky Fuentes, si Aldeguer nagtuo nga kinahanglan usab nga masinati ni Pagara ang ingon-aning matang sa away aron masuwayan ang iyang abilidad.

Si Albert manghod ni light welterweight prospect nga si Jason Pagara. (BANAT)