Creamline, PLDT bardagulan sa Pasig

MANILA, Philippines — Ang muling pagsolo sa liderato ang hangad ng Creamline, habang ang ikatlong sunod na ratsada ang ikokonekta ng PLDT sa kanilang bakbakan sa 2026 Premier Volleyball League (PVL) All-Filipino Conference Siklab Series.

Magtutuos ang Cool Smashers at High Speed Hitters ngayong alas-6 ng gabi matapos ang banggaan ng Farm Fresh Fo­xies at ZUS Coffee Thunderbelles sa ala-1 ng hapon sa Philsports Arena sa Pasig City.

Kasalukuyang magkasosyo sa top spot ang Creamline at Nxled sa magkatulad nilang 4-0 record kasunod ang Choco Mucho (3-2), PLDT (2-2), Farm Fresh (2-2), Akari (2-3), Capital1 Solar Energy (2-3), Galeries Tower (1-4) at ZUS Coffee (0-4).

Magkakasunod na tinalo ng Cool Smashers ang Chargers, Highrisers, Thunderbelles at Solar Spikers.

“We really have to prepare, especially we’ll be fa­cing PLDT. May momentum na sila, so doon muna kami magfo-focus ulit,” sabi ni coach Sherwin Meneses.

Matapos naman ang 0-2 panimula sa nine-team conference ay pinatumba ng High Speed Hitters ang Solar Spikers at Thunderbelles.

“We didn’t start the conference well, and hopefully tuluy-tuloy na ‘yung momentum namin from our two wins and hopefully, ma-build pa namin ‘yung chemistry and work on pa ‘yung kailangan naming i-work on,” ani Kim Kianna Dy sa kanilang ratsada.

Muling aasahan ng Creamline sina Jema Galanza, Alyssa Valdez, Bernadeth Pons, Tots Carlos, Bea de Leon, Pangs Panaga, setter Jia De Guzman at libero Kyla Atienza.

Makakatuwang naman ni Dy sa PLDT sina Fil-Canadian Savi Davison, Alleiah Malaluan, Mika Reyes, Majoy Baron, Dell Palomata, setter Kim Fajardo at libero Angge Alcantara.

Sa tournament format, ang top four teams matapos ang single round-robin elimination ang aabante sa semifinals.