Polo bigo sa medalya sa YOG

DAKAR -- Bigo si Angel Polo na maka-podium sa wushi’s women’s Taijiquan combined sa kanyang kampanya sa 4th Youth Olympic Games (YOG) dito.

“I will learn from this experience to get better and better,” sabi ni Polo, magdiriwang ng kanyang ika-16 kaarawan sa Disyembre 12, bago magtungo sa Dakar Airport mula sa Youth Olympic Village.

“I still have one year as a junior and I’ll be doing my best from the experiences here,” dagdag ng 10th grader sa Pasay North City High School na wagi ng bronze medal sa world championships sa Tanjin, China noong Marso.

Si Polo ang nag-iisang lahok sa wushu sa hanay ng nine-athlete Team Philippines na ipinadala ng Philippine Olympic Committee na pinamumunuan ni Abraham Tolentino at suportado ni Philippine Sports Commission chairman Patrick Gregorio.

Nakatakda pang sumalang sa kanilang mga events sina swimmers Jamesray Mishael Ajido at Riannah Chantelle Coleman sa Dakar Olympic pool

Naghahanda na rin sina gymnasts Tchelzy Maayo at Hillarion Palles III sa gabay nina coaches Reyland Capellan at Japanese Kazutaka Hakamada.

Tatakbo naman si Naomi Marjorie Caesar sa women’s 800 meters ng athletics sa Dakar Athletics Stadium.

Nakatakdang dumating dito sina Pi Durden Wangkay (men’s 200 meters), Maritanya Krog (women’s cycling) at Jade Justine Justiniane (windsurfing).

Magsisimula ang gymnastics sa Sabado kasunod ang athletics, cycling at windsurfing kinabukasan.